Tiliga asal surtgan muttaham

Maʻlumki, ko'pchilik uy- joydan boshpana sifatida foydalanadi. Uy-joyi ko'plar esa, uylarini ijaraga berishadi yoki pullarning hozirda eng "modniy" si bo'lmish "ko’ki"ga sotib yangi o'sgan niholdek bo'yinlarini bir qarich ko'tarib yuradilar. Darvoqea, Toshkent shahrining Akmal Ikromov tumani ichki ishlar bo'limi xodimlari yaqinda uy-joydan foydalanishning antiqa usulini qo'llab, faqatgina pul, mol yoki "ko’ki"nigina emas, balki naqd sarig'ini, yaʻni tillosini topgan toparman to’g’rirog’I topgan joyini tappa bosadigan bosqinchi va talonchi yigitni topib, tutib keldilar. Tutqundagi yigitning hikoya qilishicha, u nafaqat o'z uy-joyidan, balki boshqa insonlarning xonadonlaridan ham foyda olishning ancha hadisini olgan ekan. Xullas yaqinda u. Akmal Ikromov tumanidagi xonadonlardan biriga kirish uchun temir kalit yoki lo’m qidirib o'tirmabdi. Tiliga asal "surib", " qizim eshikni ochaqol, Men uy-joy boshqarmasidanman degan ekan, xonadondagi yosh qizcha unga ishonib eshikni lang ochibdi. Shu yo'l bilan ichkariga "eson-omon" kirib olgach, "shirin" tiliga zahar surtgani kamday, qo'liga pichoq ham olibdi. Norasidaga "tilla taqinchoqlarni topib bermasang..." deya do’q urgan ekan, bechora qizcha nochor, taqinchoqlarni olib chiqib beribdi.
Tergovchilarning fikricha, ilonning yog'ini yalagan bu jinoyatchi faoliyatining hali ko'p qirralari ochilgani yo'q. Bizning esa, sizga eslatib o'tmoqchi bo'lganimiz, yaʻni kissamizdan hissa shul: ayniqsa shahar joyda yashovchilar, yosh bolalaringizni uyda aslo yolg’iz qoldirib ketmang!