“Yangi zamon”da yangi zamon nafasi sezilmayapti

UYMA UY YURIB
Bizni qiynayotgan muammo bu - gaz va suv masalasi,- deydi Dang‘ara tumani «Yangi zamon» mahallasida yashovchi Yoqutxon Egamberdieva. Ko‘chamizga ulangan gazdan doimiy ravishda foydalana olmasdik. Lekin shunga qaramay, to‘lovni odam boshiga qarab hisoblab, to‘lab keldik. Bu holat og‘irlik qilgani uchun gazni umuman uzdirib tashlab, 2013 yildan beri gazsiz o‘tiribmiz. Yon ko’chalarda gaz bor, lekin bizda yo‘q. Ushbu tashkilot rahbariyati, tuman hamda viloyat hokimiyatiga murojaat qildik samarasi bo‘lmadi. Suv muammosi bo‘yicha ham Farg‘ona viloyat Hokimiyatiga murojaat etilgan edi. Mahallaga kiritilgan ichimlik suvi tarmogiga odamlar turli tomondan quvur tortib kelib, o‘zboshimchalik bilan ulanib olgan. Oqibatda ayrimlarga suv boradi, ba’zilarga yo‘q. Tashqaridan qaraganda sakkiz rekni eslatuvchi bu quvurlar juda xunuk ko’rinadi. Necha bor shuni bir chiroyli holatga keltirib beringlar deb tuman «Suvoqava» tashkilotiga murojaat qildik. Hech kim e’tibor bermaydi. Mahallamizga yaqinroq joyda dorixona yo‘q. Bolalarimiz maktabga borish uchun ikkitadan transportga chiqishadi. Bizning tomonga ham avtobus ajratishlarini, bolalarimiz uchun sport maydoni qurib berishlarini so‘raymiz.
«Yangi zamon» mahalla fuqarolar yigini raisi Burxonjon Ergashevga yuzlandik.
- Shu kabi muammolarni bartaraf etish uchun ko‘p harakat qildik, - deydi u. - Biroq natija yo‘q. Shuningdek, mahalladagi ayrim ko‘chalarga asfalt ham yotqizishimiz kerak. Bir necha bor tuman hokimiyatiga xat bilan murojaat qilganmiz. Mahallada 1100 oila mavjud. 3501 aholi 790 xonadonda istiqomat qiladi.
Mahalla posboni Zayniddin Yoqubov hamda mahalla faoli Dinoraxon Raxmatova bilan uyma- uy yurib, «Yangi zamon mahallasi ahlining turmushi bilan tanishdik. Yo‘l- yo‘lakay hududdagi 6-maktabgacha ta’lim muassasasiga kirdik. Bog‘cha mudirasi Jumagul Abdurahimova juda talabchan raxbarlardan ekan.
- Bog‘chada 120 nafar bola tarbiyalanadi. 14 nafar pedagog, 5 guruh mavjud. Ko‘rib turganingizdek, bogchamiz yaqinda ta’mirdan chiqqan. Lekin musiqa xonasi juda eski. Shuni buzib, boshqatdan qurish uchun xomiy kerak. Bundan tashqari, hozir siz kirib kelgan yo‘lak o‘nqir-cho‘nqir bulib yotibdi. Uni asfaltlash ham mablagga kelib taqalmoqda, - deydi mudira kuyunchaklik bilan.
Bog‘cha holati bir qarashda ozoda, saranjom. Lekin yuqorida ko‘rsatilgan muammolar ushbu poki- zalikka dog bo‘lib turibdi...
«Yangi zamon» mahallasi, 468-uyda yashovchi Qobiljon Sotvoldievning ikkala buyragi ham ishlamaydi. 24 yoshida shu xastalikka chalingan. Hozirda 30 yoshda. Uylangan. Bir o‘g‘li bor. 1- guruh nogironi, nafaqa oladi. Ishga layoqatsiz.
420- uyda istiqomat qiluvchi 93 yoshli Xayriniso aya Botiralieva turmush o’rtog’i A’zamjon Mingboyev bilan 5 o‘g‘il, 3 qizni tarbiyalab elga qo‘shgan. Umr yo‘ldoshi A’zamjon ota Mingboyev 2014- yil 100 yoshda vafot etgan.
- Eng katta farzandimiz Azizjon 65 yoshda, - deydi aya. Kenja o‘g‘lim Akromjon bilan yashaymiz. Bolalar holimdan xabar olib turishibdi. Baraka topishsin. El- yurtimiz tinch, Hayotimiz yaxshi. Bolalarim, nevaralarimga shu kunlar, shunday ne`matlarning qadriga yetinglar, deb nasixat qilaman. Ishqilib, barining boshi omon bo‘lsin.
«Yangi zamon» mahallasi, 150- uy ostonasini hatladik. Xonadon sohibasi Mavluda Solievaning turmushi bo‘lmagan. Otasidan qolgan hovlida 33 yoshli o‘g‘li Ahror Qo‘chqorov bilan yashaydi. Ahror 5 yoshligida avval o‘ng, keyin chap qulog‘idan yara chiqqan. Yarani oldirib tashlab, davolangan. Lekin shundan keyin qulog‘i eshitmaydigan, o‘zi gapirolmaydigan bo‘lib qolgan. Uning xastaligi tufayli maktabga ham qabul qilishmagan. Biron joyda ishlolmaydi ham. Ona 120 ming so‘m nafaqa oladi. O‘g‘liga nafaqa olish masalasida Dang‘ara tumani, «Yangi zamon» fuqarolar yig‘ini hududidagi qishloq vrachlik punktida shifokor bo‘lib ishlaydigan Shermatov huzuriga borishgan. Lekin shifokor: «Uning qo‘l- oyog‘i but. Ko‘zi ko‘radi. Ishga layoqatli», - deb qaytarib yuborgan. Dangara tuman ko‘ptarmoqli poliklinikasiga eshitish moslamasi so’rab murojaat qilsa, bunday moslama unga tushmabdi. Muammolar girdobida qolgan Mavluda Solieva kimga dodini aytishni bilmaydi.
«Yangi zamon» mahallasi, 561- uyda istiqomat qiluvchi Murodjon Raxmonov 25 yildan beri pasport ololmaydi. Chunki uning ota- onasi Tojikistonda turmush qurib, keyinchalik O‘zbekistonga ko‘chib kelishgan. Murodjon o‘sha yerda tug‘ilgan. Shu bois O‘zbekiston fuqarosi emas. O‘zbekiston fuqaroligini olish uchun tuman ichki ishlar bo‘limiga barcha so‘ralgan hujjatlarni topshirgan. Hozircha, jo‘yali javob yo‘q...
Odamlar bilan dildan suhbatlashib, muloqot qilib shunga amin bo‘ldikki, muammolari bo‘lishiga qaramay, xalq boriga shukr kilib yashamoqda. Mahalla ahli juda axil, oqibatli. Ertangi yorug‘ kunlarga ishonadi.