Bаyrаmni yangi uydа kutib olishdi

Termiz shahrida Oʼzbekiston Respublikasi Milliy xavfsizlik xizmati chegara qoʼshinlarining bir guruh harbiy xizmatchilari uchun 30 xonadonga moʼljallangan uch qavatli zamonaviy yangi uy foydalanishga topshirildi.
Shu munosabat bilan tashkil etilgan marosimda xarbiy xizmatchilar, ularning oila aʼzolari, davlat va jamoat tashkilotlari vakillari, faol yoshlar va nuroniylar ishtirok etdi. Tadbirda Prezidentimiz, Qurolli Kuchlar Oliy Bosh Qoʼmondoni Islom Karimov rahnamoligida mamlakatimiz mudofaa qudratini mustahkamlash, xalqimizning tinch-osuda va farovon hayotini taʼminlashga qaratilayotgan alohida eʼtibor yuksak samaralar berayotgani taʼkidlandi. Sohada amalga oshirilayotgan islohotlar tufayli zamonaviy qurol-yarogʼ, texnika va professional harbiy mutaxassislar bilan taʼminlangan, harakatchan milliy armiyamiz barpo etildi. Harbiy xizmatchilarni ijtimoiy himoya qilishning mustahkam tizimi yaratilib, ularning oila aʼzolarini zamonaviy va shinam uy-joy bilan taʼminlashga eʼtibor kuchaytirildi. 2014 yilda Oʼzbekiston Respublikasi Milliy xavfsizlik xizmati chegara qoʼshinlarida xizmat qilayotgan harbiylarni oilasi uchun 436 xonadonga moʼljallangan yangi uy-joylar qurilib, foydalanishga topshirilgani buning yorqin dalilidir.
-Uch xonali yangi uy Vatan himoyachilari kuni arafasida oilamiz uchun munosib sovgʼa boʼldi, deydi ofitser Bahodir Zulfiqorov. Bu yerda yaratilgan sharoitlardan farzandlarimiz, ayniqsa, xursand. Bu biz, harbiylarning sharafli vazifamizni koʼngil toʼq, xotirjam ado etishimiz va sarhadlarimiz daxlsizligi taʼminlashda muhim omil boʼlib xizmat qiladi.
Qurolli Kuchlarimiz tashkil etilganining yigirma uch yilligi va Vatan himoyachilari kuni arafasida Termiz shahrida foydalanishga topshirilgan 30 xonadonga moʼljallan gan yangi uyda barcha sharoitlar yaratilgan. Xonalar keng, yorugʼ, shinam. Oshxona va boshqa qoʼshimcha xonalar zamonaviy usulda jihozlangan. Harbiylarning farzandlari uchun zamonaviy oʼyin maydonchasi, ochiq suv havzasi barpo etilgan. Zamonaviy uy "Saodatbonu - Аziza - Termiz" xususiy korxonasi quruvchilari tomonidan belgilangan muddatda bunyod etildi. Buning uchun uch milliard soʼmga yaqin mablag sarflandi.
Keksalarni eʼzozlash yilining dastlabki oyida harbiylarga bunday zamonaviy uylarning topshirilishi nuroniylarimizda ham oʼzgacha havas uygʼotib, ularda tinch va osuda Vatanda yashayotganidan faxr-iftixor tuygʼusini yanada kuchaytirdi.
Tadbirda yangi uyning kaliti topshirilgan chegarachilarning farzandlariga bayram sovgʼalari ulashildi.