Qonun va mehr bilan himoyalangan bolalik

Bolalarni himoya qilish kuni deganda men ular qalbidagi betakror umid, betakror ishonch, betakror hayratlarni ham himoya qilish onlari deb tushunaman.
...Bir xizmat safarimda qoraqalpog'istonlik shoira Guliston Matyoqubova bilan Kegayli tumani ko'chalarida ketayotib, paxsa devorni ayri qilib minib o'tirgan bolaga ko'zimiz tushdi.
- Tush devordan, yiqilasan, dedi Guliston opam. Yiqilmayman, men qoraqalpoqman, - dedi bola g’urur bilan.
- Zo'rsan-u, isming nima? Temur.
Unda sen chindan ham yiqilmas ekansan, dedi Guliston opam. Men quyoshda qorayib ketgan ana shu chayir bolakayning ovozidagi qatʻiyatni ko'rib, his etib, qalbidagi ishonch himoya etilayotganiga qattiq ishonganman. Ajoyib musavvira Gulzor Sultonning o'nlab shogird bolalari bor. Diyora, Laylo, Jasur... Men ular chizgan sur’atlarni uzoq-uzoq tomosha qilishni yoqtira man. Ular jajji qo'llari bilan ishlagan haykalchalar ham mo'ʻjizaga o'xshaydi. Sur’atlar, haykalchalarda nur ko'p, go'zallik quyuq, Ranglar tiniq. Tasvirlar ichiga kirib ketging keladi.
Men shunday ajoyib damlarda mana shu bolalar, qizchalar ko'nglidagi hayratlar himoya qilinayotganidan suyunaman. Jahon sport maydonlarida bellashib qaytayotgan bolalarimizni tayyoragohda kutib olishayotganda, muxbirlar savollariga hayajon bilan javob berayotgan bolalardan birining javobi esimda qolgan:
- Darvozadan bittagina to'p o'tkazib yubordingiz. O'sha paytda qanday holga tushdingiz?
To’p yuragimga tekkanday bo'ldi.
Albatta, bu javobdan yosh darvozabon qalbidagi or-nomus, muxabbat atalmish ulug' tuyg'ular himoya qilinayotganini bilib olish qiyin emas. Bu holatlar o'z-o'zidan yuzaga kelmaydi.. Mamlakatimizda turli yillar munosabati bilan qabul qilinayotgan Davlat dasturlari, bu dasturlarning amalga oshishi uchun davlat xazinasidan ajratilayotgan salmoqli mablag'lar, "Umid nihollari" sport musobaqalari, "Yosh kitobxonlar" : tanlovi, sanʻat yulduzlari bellashuvlari ... bu tadbirlar ko'lami, nufuzi jihatdan biri - ulkanroq, biri kichikroq, ammo mazmuni mohiyati bolalikni jismoniy, ruhiy himoyalashga tutash.
Yosh avlodning ilmini, erkin fikrlashini kengaytirish, chuqurlashtirishga qaratilgan tadbirlar tashkil qilinsa, va 1-iyunda yakunlansa, bu kun mazmun-mohiyati yanada boyirdi, degan fikrdaman. Albatta, bolalarni mexnatga o'rgatish kerak. Ammo vaziyat taqozosi bilan olis-yaqin qishloqlarga borganda bir manzaraga ko'zimiz tushib qoladi. Qatqaloqmi, xirmon ko'tarish paytimi, xullas ish qiziganda baʻzi oilalar bolalarini tez-tez maktabdan olib qolishadi. Yoshiga nisbatan ogir kelguvchi mexnatda ezilib kolish, boshi, elka- sida ogir yuk ko'tarish bularning hammasi bolalik himoyasiga soya soladi. Boya aytganimizday, bolalikning o'zi bayram.
Qonun bilan, mexr bilan himoyalangan bolalik esa ikki karra bayramdir. Shu boisdan osmonimizda bolalarimizning yuraklari varrak bo'lib parvoz qilayotgan shu lahzalarni ham tabrigim, tilagim, istagim uchun bir imkon deb bildim….
Ko'zingda quyoshlar kuladi,
Ishlasang, ko’z yoshlar kuladi.
Oyog’ing tekkanda tuproqlar,
Hatto chaqir toshlar quladi.
Osmonlarga havas bog'laysan,
O'zingni uchmoqqa chog’laysan.
Xohlaysan chiroyli bir hayot,
Jasoratli hayot xoxlaysan.
Kim sening yo'lingni kesadi,
Orqangdan hur shamol esadi.
Qalbingning eng chuqur joyidan,
Buyuk bir muhabbat o'sadi,
Quvonchim bog’ida dur, bolam,
Baxtni quchib yashab yur, bolam.
Ziyragim, topqirim, olovim,
Nurbolam, dur bolam, zo’r bolam.