Kelajak Vorislariga e’tibor

Bolalar kelajagimiz. Bugungi qilinayotgan ezgu ishlarimizning vorislari, davomchilari. Barcha umidlarimiz, ishonchimiz shulardan. Demak, ularni ana shu sharafli yo'lga boshlash, kelajak estafetasini ular qo'liga ishonib topshirishdan oldin o'zlarini hayotga tayyorlash, sinovlarga bardoshli qilib tarbiyalash zimmamizdagi muhim va kechiktirib bo'lmaydigan dolzarb vazifadir. Xo'sh, ana shu muhim ish joylarda qanday va qay tariqa amalga oshirilmoqda? Muxbirimizning O'zbekiston Bolalar jamg’armasi Samarqand viloyat bo'limi raisi Z.MUHIDDINOV bilan suhbati ana shu haqda kechdi.
- Bolalar jamg’rmasi, uning maqsad va vazifalari haqida gap ketar ekan ota-ona mehriga tashna bo'lgan mexribonlik uylaridagi inson muruvvatiga muhtoj yashayotgan nogiron bolalar maskanlaridagi o'g'il-qizlar ko'z oldimizga keladi. Har kungi ish kunimizni beihtiyor jamiyatimizning og’riqli nuqtalari bo’lgan o'sha joylardagi ahvollni o’rganishdan boshlaymiz. Iqtisodiy imkoniyatlarimizni chamalab, tez – tez ularga moddiy ko'mak berishga, imkon bo'lmagan kezlarda maʻnaviy madad ulashib, o'ksik dillariga ko'tarinki ruh bag’ishlashga harakat qilamiz. Masalan, o’tgan yilgi Mustaqillik bayrami arafasida Samarqand Tibbiyot oliygoxi talaba yoshlaridan tuzilgan badiiy havaskorlik guruxi bilan 11-son Mexribonlik uyida katta dasturda konsert namojish etdik. Shuningdek, har bir tarbiyalanuvchiga aloxida bayram sovg’alari ulashdik. Xam ma’naviy, xam moddiy rag'batga sazovor bo'lgan bolalarning quvonchini oddiy so’z bilan ifoda qilish qiyin edi. Bir nafasga bo’lsa-da, ular o'shanda anduhlarini unutishgandi, chamamda. Bemorning holidan xabar olish xam xalqimizning amaliy va ezgu udumlaridan sanalib shirin so'zlar bilan tani sixatlik tilash, ruhini ko'tarish bilan bobo va momolarimiz bemorlar dardiga malham bo'lishgan. Faoliyatimiz ezgulik asosiga qurilgan ekan, xalqimizning ana shu muborak udumi ham dasturimizdan alohida o'rin oldi. Dardga malxam bo'lishning nechog’lik savob ish ekanligini viloyat sil kasalliklari shifoxonasining bolalar bo'limida davolanayotgan bemorlar huzurida bo'lganimizda chuqur his qildik. Ushbu uchrashuvimiz ham tabiiyki kuy-qo'shiqlar, raqslar, ko'ngilochar tomoshalar bilan boyitilgandi. Pirovardida, bemor bolalarga jamg'armamiz tomonidan xozirlangan sovg'a-salomlar, dori-darmonlar ulashildi. Jamg'armamiz faollari ko'proq xalq bilan bo'lishga, mehnat ahli orasiga kirib borishga harakat qilishadi. Oddiy xalqning ijtimoiy ahvolini o'rganish tufayli bultur viloyatda 70 ga yaqin ahvoli nochor, bemor bolalar ro'yxatga olindi. Bu haqda yuqori tashkilotimizga ma’lum qilganimizda ular ushbu bolalarni to'plash, shahar va tumanlar hokimliklari vakillari ishtirokida ularga sovg’alar ulashish, moddiy yordam uyushtirish tashabbusini o'rtaga tashladilar. Viloyat hokimligi, xotin - qizlar qo'mitasi rahnamoligi va ko'magi tufayli uyushtirilgan ushbu tadbir natijasi kutilganidan ham ziyoda bo'ldi. Ayniqsa, unda ishtirok etgan YUNISEF xalqaro insonparvarlik tashkilotining respublikamizdagi vakolatxonasi vakili janob Rudi Rodriges va respublika Bolalar jamg'armasi raisi I. Yusupova katta taassurotlarga ega bo'lishdi. Yana bir gal. O'zbek qizlarining odob-axloqi, latofati va malohati avvalo oilada shakllanadi. Oila tashvishlariga o'ralashib kolgan ota-onalarga bu masʻuliyatli ishda ko’mak berishni xam o'zbekona burchimiz deya his qilamiz. Shahrimizdagi oliy o’quv yurtlarining talaba qizlari o'rtasida tashkil etganimiz "Qizlar mustaqil xat bo'sag'asida" ko'rik-tanlovi ana shu maqsadni ko'zda tutdi.
Unda ro'zgor yumushlaridan tashqari, xotin-qizlar gigienasi, odob-ahloqi, muomala madaniyatiga alohida ahamiyat beriladi.
Pastdarg’om tumanida esa sportning qariyb barcha turlari bo'yicha bolalar spartakiadasi uyushtirildi. G’olib o'smirlar, jamg'armamiz sovrinlari sohibi bo'ldilar. Bundan tashqari, tumaning "Sanchiqul" fuqarolar yig’ini xududida jamg’arma ko'magi va tashabbusi bilan ijtimoiy ahvoli og'ir oilalarning 10 nafar farzandlari uchun sunnat to'yi o'tkazildi. Bu tadbirga iqtidorli bolalarning qo'shiq bayrami ham ulanib ketdi.
Bir so'z bilan aytganda shu xil tadbirlar, uchrashuvlar, savol-javob kechalari, bolalarning shifokorlar, olimlar, shoir va yozuvchilar, urush faxriylari, umuman taniqli kishilar bilan uchrashuvlari faoliyatimizning asosiy mazmun-mundarijasini tashkil etib, qariyb har oyda amalga oshirilib turilibdi. Bu tadbirga falon ming, bunisiga pismadon ming so'm mablag' sarfladik, deyish menimcha maqtanchoqlikdan boshqa narsa emas. Muhimi, xalq orasida bo'lish, uning shodligi va g'amiga sherikchilik qilish, deb o'ylayman. O’tkazilayotgan tadbirlar esa jamg'armamizning xalq bilan yanada jipslashuviga asos bo'lmoqda. Bu xayrli ishda viloyat xokimligi, xotin-qizlar qo'mitasi, "Tadbirkor ayollar" uyushmasi, "Sog’lom avlod", "Nogironlar" jamg’armalari, "Kamolot" ijtimoiy yoshlar harakati, xalq taʻlimi boshqarmasi va hokimliklar bilan hamkoru hamnafasligimiz qo'l kelmoqda. O'tgan yili Kattaqo'rg'on va Pastdarg’om tumanlarida jamg’armamiz bo'limlarining ochilganligi yana bir katta yutug’imiz bo'ldi. Xullas, jamg’armamiz faollari o'z oldilariga qo’yilgan vazifalarni aniq dastur asosida sidqidildan ado etayapti, deya komil ishonch bilan ayta olamiz.