Tayzanlik Tadbirkor ayol

Qashqadaryo viloyatining Koson tumanidagi “Qo’ngirtov” jamoa-shirkat xo’jaligining Tayzan qishlog’ida istiqomat qiluvchi Oygul Safarovaning dehkon fermer xo'jaligi tashkil qilganini eshitgan ayrim qishloqdoshlari ajablanishdi:
Eri milisiyada ishlaydi, kechayu kunduz xizmatdan bo'shamasa, ayol boshi bilan dehkon fermer xo’jaligini eplay olarmikin. Odamlarning hadiksirashlari ortda qoldi. Oygul katta niyat, zo’r qatʻiyat bilan boshlagan xayrli ishini binoyidek eplay boshladi. Dala ishlarida unga o’g’li Ali, qizi Dilfuza, qarindoshi Alisher va Xoliqullar ko'makdosh bo’lishdi. Tez orada Oygul Safarovaning umr yo’ldoshi Oltiboy Soyipov ham ichki ishlar bo’limi xizmatidan qarilik nafaqasiga chiqib ularga ko'makka keldi. Shunday qilib, “Hazrati Govsil A’zam” nomi bilan atalgan mazkur oilaviy dehkon fermer xo’jaligi jamoasi yakunlanayotgan yilda besh gektar maydonga “Buxoro-6” navli paxta, uch gektarga makkaj”xori, uch gektarga “Bolg’ali” navli arpa ekib dehqonchilik ishlari va fermerlik faoliyatlarini boshlashdi. Sinov natijasi chakki bo’lmadi. Davlat xazinasiga rejadagi paxta va arpa hosili o'z vaqtida yetkazib berilib, makkajo’xoridan tayyorlangan silos esa chorvador fermerlarga sotildi. Tadbirkor ayol Oygul Safarova boshliq fermerlar yilni ikki yuz ming sumdan oshiq sof foyda ko’rish bilan sarhisob qilmoqdalar. Hazrati G’ovsil Aʻzam ruhlari o’zlariga madadkor bo’lganidan benihoya ruhlanishgan fermerlar yer maydonini kengaytirishib, hozirgi kunda qirq gektar maydonga ega bo'lishdi. Shuning o’n uch gektariga g’alla ekishib, yigirma gektarini paxta, uch gektarini beda, to’rt gektarini poliz va sabzavot ekinlari ekishga tayyorlashmoqda. Kelgusi yilda lalmi g’allaning har gektaridan o'ttiz sentnerdan, paxtaning gektaridan uttiz besh sentnerdan hosil ko'tarishib, yuz tonna poliz va sabzavot mahsulotlari yetishtirishi niyat qilishgan fermerlar ayni kunlarda mavsumiy dala ishlarini sifatli bajarish uchun astoydil mehnat qilishmoqda.
- Bizni texnika kuchi, mineral o’g’itlar bilan yetarlicha taʻminlashda va boshqa amaliy yordamlar ko'rsatishda xo’jalik rahbari Mirza Orzievning g’amxo’rliklari juda katta bo’layapti, - deb taʻkidlaydi Oygul Safarova.
- Xo’jalik tomonidan nimaiki zarur bo’lsa, hammasini o’z vaqtida muhayyo qilib berishayapti. Ishimizga, ishlashimizga monelik qiladigan hech qanday to'siq yo’q. Shuning uchun kelgusi rejalarimizning to'la-to'kis uddalanishiga ishonchimiz komil.